உதயநிதி ஸ்டாலினுக்கு பதிலாக நடித்த சேரன்… அந்த சூப்பர் ஹிட் படம் எது தெரியுமா?

சினிமாவில் பாப்புலர் ஹீரோக்களில் ஒருவராக வலம் வருபவர் உதயநிதி ஸ்டாலின். இவர் தமிழக முதல்வர் மு.க.ஸ்டாலினின் மகனாக இருந்தும் திரையுலகில் தனக்கென ஒரு ஃபார்முலாவை பிடித்துக் கொண்டு தொடர்ந்து படங்களில் நடித்து கொண்டிருக்கிறார். உதயநிதி தயாரிப்பாளராக களமிறங்கிய முதல் படத்திலேயே ஹீரோ விஜய் தான். அது தான் ‘குருவி. தரணி இயக்கியிருந்த இந்த படத்தை உதயநிதி ஸ்டாலின் தனது ‘ரெட் ஜெயன்ட் மூவிஸ்’ மூலம் தயாரித்தார்.

‘குருவி’ படத்துக்கு பிறகு ‘ஆதவன், மன்மதன் அம்பு, 7-ஆம் அறிவு’ ஆகிய படங்களை தனது நிறுவனம் மூலம் தயாரித்தார் உதயநிதி ஸ்டாலின். இதில் ‘ஆதவன்’ படத்தில் கெஸ்ட் ரோலில் உதயநிதி வலம் வந்தார். அதன் பிறகு ‘ஒரு கல் ஒரு கண்ணாடி’ படத்தில் ஹீரோவாக அவதாரம் எடுத்தார். ‘ஒரு கல் ஒரு கண்ணாடி’ படத்தின் ஹிட்டிற்கு பிறகு நடிகர் உதயநிதி ஸ்டாலினுக்கு அடித்தது ஜாக்பாட்.

அடுத்தடுத்து இவரின் கால்ஷீட் டைரியில் ‘இது கதிர்வேலன் காதல், நண்பேன்டா, கெத்து, மனிதன், சரவணன் இருக்க பயமேன், பொதுவாக எம்மனசு தங்கம், இப்படை வெல்லும், நிமிர், கண்ணே கலைமானே, சைக்கோ, நெஞ்சுக்கு நீதி’ என தமிழ் படங்கள் குவிந்தது. இப்போது உதயநிதியின் நடிப்பில் ‘கலகத் தலைவன், ஏஞ்சல், கண்ணை நம்பாதே, மாமன்னன்’ மற்றும் கமல் ஹாசன் தயாரிக்கும் படம் என ஐந்து படங்கள் லைன் அப்பில் இருக்கிறது.

இந்நிலையில், உதயநிதி ஸ்டாலின் நடிக்காமல் மிஸ் பண்ண ஒரு சூப்பர் ஹிட் படம் குறித்த தகவல் கிடைத்துள்ளது. 2011-யில் ரிலீஸான தமிழ் படம் ‘யுத்தம் செய்’. இந்த படத்தை பாப்புலர் இயக்குநர்களில் ஒருவரான மிஷ்கின் இயக்கியிருந்தார். இதில் ஹீரோவாக சேரன் நடித்திருந்தார். ஆனால், இந்த படத்தில் ஹீரோவாக நடிக்க வைக்க வேண்டுமென இயக்குநர் மிஷ்கினின் முதல் சாய்ஸாக இருந்தது உதயநிதி தானாம். பின், சில காரணங்களால் உதயநிதியால் இப்படத்தில் நடிக்க முடியாமல் போனதாம்.

Share.