‘நம்மவர்’ பட இயக்குநர் கே.எஸ்.சேதுமாதவன் காலமானார்… இரங்கல் தெரிவித்த கமல் ஹாசன்!

சமீப காலமாக தொடர்ச்சியான மரணங்கள் ரசிகர்களுக்கும், திரையுலகினருக்கும் அதிர்ச்சியைத் தருகிறது. பிரபல பின்னணி பாடகர் எஸ்.பி.பாலசுப்ரமணியம், பிரபல காமெடி நடிகர்கள் விவேக் – பாண்டு – நெல்லை சிவா – மாறன், பிரபல இயக்குநர்கள் எஸ்.பி.ஜனநாதன் – தாமிரா, பிரபல ஒளிப்பதிவாளரும், இயக்குநருமான கே.வி.ஆனந்த், கன்னட நடிகர் புனித் ராஜ்குமார் என ரசிகர்களுக்கும், திரையுலக பிரபலங்களுக்குமே பிடித்தமான நபர்களின் இழப்பு அதிர்ச்சியளிக்கிறது.

இந்த சூழலில் இன்னொரு மரணச் செய்தி வந்திருக்கிறது. மலையாள சினிமாவில் பாப்புலர் இயக்குநர்களில் ஒருவராக வலம் வந்தவர் கே.எஸ்.சேதுமாதவன். இவர் இதுவரை 10 தேசிய விருதுகளை வாங்கியிருக்கிறார். கே.எஸ்.சேதுமாதவன் தான் நடிகர் கமல் ஹாசனை மலையாள சினிமாவில் அறிமுகப்படுத்தியவர் என்பது குறிப்பிடத்தக்கது.

இவர் தமிழில் கமல் ஹாசனின் ‘நம்மவர்’, சிவக்குமாரின் ‘மறுபக்கம்’, எம்.ஜி.ஆரின் ‘நாளை நமதே’ போன்ற படங்களை இயக்கியிருக்கிறார். தற்போது, இயக்குநர் கே.எஸ்.சேதுமாதவன் உடல்நலக்குறைவால் இயற்கை எய்தினார் என தகவல் கிடைத்துள்ளது. இவரது மறைவுக்கு திரையுலகினர் பலர் சமூக வலைத்தளங்களில் இரங்கல் தெரிவித்து வருகின்றனர்.

கே.எஸ்.சேதுமாதவனின் மறைவு குறித்து நடிகர் கமல் ஹாசன் ட்விட்டரில் “காலத்தால் அழியாத காவியங்களைத் திரையில் படைத்த கே.எஸ்.சேதுமாதவன் புதிய அலை சினிமாவின் ஊற்றுமுகம். மலையாள சினிமாவின் தரத்தைத் தீர்மானித்த அடிப்படை விசைகளுள் ஒருவர்.த ன் கலைச்சாதனைகளால் என்றென்றும் நினைவு கூரப்படுவார். என் சேது சாருக்கு, நல்ல சினிமாவை கற்பித்த ஆசிரியருக்கு அஞ்சலிகள்” என்று கூறியுள்ளார்.

Share.