“சூர்யாவை தாக்க சொன்னவரை எட்டி உதைங்க நான் காசு தர்றேன்”… ‘ஜெய் பீம்’ சர்ச்சை குறித்து பேசிய சீமான்!

சினிமாவில் டாப் ஹீரோக்களில் ஒருவராக வலம் வருபவர் சூர்யா. இவர் நடிப்பில் வெற்றிமாறன் இயக்கும் ‘வாடிவாசல்’, த.செ.ஞானவேல் இயக்கும் ‘ஜெய் பீம்’, பாண்டிராஜ் இயக்கும் ‘எதற்கும் துணிந்தவன்’ என மூன்று படங்கள் லைன் அப்பில் இருந்தது. இதில் த.செ.ஞானவேல் இயக்கியுள்ள ‘ஜெய் பீம்’, சூர்யாவின் கேரியரில் 39-வது படமாம். இப்படம் கடந்த நவம்பர் 2-ஆம் தேதி தீபாவளி ஸ்பெஷலாக பிரபல OTT தளமான ‘அமேசான் ப்ரைம்’-யில் ரிலீஸானது.

சூர்யா வக்கீலாக நடித்திருந்த இந்த படத்தில் மிக முக்கிய ரோல்களில் பிரகாஷ் ராஜ், ரஜிஷா விஜயன், லிஜோமோல் ஜோஸ், மணிகண்டன், ராவ் ரமேஷ், குரு சோமசுந்தரம், தமிழ், எம்.எஸ்.பாஸ்கர், ஜெயபிரகாஷ், இளவரசு, சுஜாதா சிவக்குமார், சிபி தாமஸ் மற்றும் பலர் நடித்திருந்தனர். இந்த படத்துக்கு பாப்புலர் இசையமைப்பாளர்களில் ஒருவரான ஷான் ரோல்டன் இசையமைத்திருந்தார், எஸ்.ஆர்.கதிர் ஒளிப்பதிவு செய்திருந்தார். இப்படத்தை பார்த்த திரையுலக பிரபலங்களும், ரசிகர்களும், விமர்சகர்களும் பாராட்டிய வண்ணமுள்ளனர்.

1993-ஆம் ஆண்டு வழக்கறிஞர் சந்துரு என்பவர் ஒரு பழங்குடிப் பெண்ணுக்கு போலீஸால் ஏற்படும் ஒரு பிரச்சனைக்காக நடத்திய உண்மையான வழக்கை மையமாக வைத்து தான் இப்படத்தின் கதைக்களம் அமைக்கப்பட்டிருந்தது. சமீபத்தில், இந்த படத்தில் வன்னியர் சமுதாயத்தை தவறாக சித்தரித்ததாக குறிப்பிட்ட பா.ம.க மாவட்ட செயலாளர் சித்தமல்லி பழனிச்சாமி “நடிகர் சூர்யா மயிலாடுதுறைக்குள் வந்தால், அவரை எட்டி உதைக்கும் இளைஞருக்கு ரூ.1 லட்சம் பரிசு வழங்கப்படும்” என்று கூறியிருந்தது சர்ச்சையை ஏற்படுத்தியது.

இதனைத் தொடர்ந்து பா.ம.க மாவட்ட செயலாளர் சித்தமல்லி பழனிச்சாமி மீது காவல்துறையினர் 5 பிரிவுகளின் கீழ் வழக்குப்பதிவு செய்தனர். தற்போது, இது தொடர்பாக திரைப்பட இயக்குநரும், நாம் தமிழர் கட்சியின் தலைமை ஒருங்கிணைப்பாளருமான சீமான் மீடியாவுக்கு கொடுத்த ஒரு பேட்டியில் “சூர்யாவை எட்டி உதைக்க சொன்னவரை வேணும்னா உதைங்க, நான் காசு தர்றேன்” என்று கூறியுள்ளார்.