சினிமாவில் பாப்புலர் ஹீரோயின்களில் ஒருவராக வலம் வந்தவர் எமி ஜாக்சன். இவருக்கு தமிழ் மொழியில் அமைந்த முதல் படமே சூப்பர் ஹிட்டானது. அது தான் ‘மதராசபட்டினம்’. ஆர்யா ஹீரோவாக நடித்திருந்த இந்த படத்தை பாப்புலர் இயக்குநர்களில் ஒருவரான ஏ.எல்.விஜய் இயக்கியிருந்தார்.
‘மதராசபட்டினம்’ படத்தின் வெற்றிக்கு பிறகு நடிகை எமி ஜாக்சனுக்கு அடித்தது ஜாக்பாட். அடுத்தடுத்து இவரின் கால்ஷீட் டைரியில் ‘தாண்டவம், ஐ, தங்கமகன், கெத்து, தெறி, 2.0, மிஷன் சேப்டர் 1’ என தமிழ் படங்கள் குவிந்தது. எமி ஜாக்சன் தமிழ் மொழி படங்கள் மட்டுமில்லாமல் கன்னடம், ஆங்கிலம், ஹிந்தி மற்றும் தெலுங்கு ஆகிய மொழி படங்களிலும் நடித்து ரசிகர்களிடம் அப்ளாஸ் வாங்கியிருக்கிறார்.
இங்கிலாந்தை சேர்ந்த தொழிலதிபர் ஜார்ஜ் பனயிட்டோவை காதலித்து திருமணம் செய்து கொண்ட எமி ஜாக்சனுக்கு 2019-ஆம் ஆண்டு செப்டம்பர் 19-ஆம் தேதி ஆண் குழந்தை (பெயர் : ஆண்ட்ரியாஸ்) பிறந்தது. சமீபத்தில், இன்ஸ்டாகிராமில் கணவரின் பெயரை எமி ஜாக்சன் நீக்கியதால் இருவரும் பிரிந்து விட்டதாக சொல்லப்பட்டது.
மேலும், பிரபல நடிகர் எட் வெஸ்ட்விக்கை எமி ஜாக்சன் காதலித்து வருவதாகவும், அவருடன் டேட்டிங் சென்று வருவதாகவும் தண்டோரா போடப்பட்டது. பின், இதை உறுதிபடுத்தும் வகையில் எமி ஜாக்சனே தனது இன்ஸ்டாகிராம் பக்கத்தில் எட் வெஸ்ட்விக்குடன் இருக்கும் ஸ்டில்ஸை வெளியிட்டார். தற்போது, எமி ஜாக்சனுக்கும், எட் வெஸ்ட்விக்கிற்கும் திருமண நிச்சயதார்த்தம் நடைபெற்றதாக தகவல் கிடைத்துள்ளது.
