பிரபல நடிகர் சிவக்குமாரின் மகனாகவும், நடிகர் சூர்யாவின் தம்பியாகவும் இருந்தும் திரையுலகில் தனக்கென ஒரு ஃபார்முலாவை பிடித்து ஹிட் படங்களில் நடித்து வருகிறார் கார்த்தி. அறிமுகமான முதல் படமே மிகப் பெரிய வெற்றி பெறுவது என்பது எல்லோருக்கும் அமைந்து விடாது. ஆனால், கார்த்திக்கு அமைந்தது. அது தான் ‘பருத்திவீரன்’ படம். இந்த படத்தை இயக்குநர் அமீர் இயக்கியிருந்தார்.
‘பருத்திவீரன்’ ஹிட்டிற்கு பிறகு கார்த்திக்கு அடித்தது ஜாக்பாட். அடுத்தடுத்து அவரின் கால்ஷீட் டைரியில் ‘ஆயிரத்தில் ஒருவன், பையா, நான் மகான் அல்ல, சிறுத்தை, மெட்ராஸ், கொம்பன், தீரன் அதிகாரம் ஒன்று, கைதி, சுல்தான்’ என படங்கள் குவிந்தது. ஒவ்வொரு படத்திலும் வித்தியாசமான கேரக்டரில் நடித்து ரசிகர்களிடம் அப்ளாஸ் வாங்கினார் கார்த்தி.
2011-ஆம் ஆண்டு ரஞ்சனி என்பவரை திருமணம் செய்து கொண்டார் கார்த்தி. இவர்களுக்கு உமையாள் என்ற மகளும், கந்தன் என்ற மகனும் உள்ளனர். இப்போது, கார்த்தி நடிப்பில் ‘பொன்னியின் செல்வன்’, ‘விருமன்’ மற்றும் ‘சர்தார்’ என மூன்று படங்கள் லைன் அப்பில் இருக்கிறது. இந்நிலையில், கார்த்தி நடிக்காமல் மிஸ் பண்ண ஒரு சூப்பர் ஹிட் படம் குறித்த தகவல் கிடைத்துள்ளது.
இந்த ஆண்டு (2021) OTT-யில் ரிலீஸான தமிழ் படம் ‘சார்பட்டா பரம்பரை’. இந்த படத்தை பாப்புலர் இயக்குநர்களில் ஒருவரான பா.இரஞ்சித் இயக்கியிருந்தார். இதில் ஹீரோவாக ஆர்யா நடித்திருந்தார். ஆனால், ஹீரோ ரோலில் நடிக்க வைக்க வேண்டுமென இயக்குநர் பா.இரஞ்சித்தின் முதல் சாய்ஸாக இருந்தது கார்த்தி தானாம். பின், சில காரணங்களால் கார்த்தியால் இப்படத்தில் நடிக்க முடியாமல் போனதாம்.
