எஸ்.எஸ்.ராஜமவுலி இயக்கத்தில் வெளியான பிரம்மாண்ட திரைப்படம் தான் “பாகுபலி”. ஐந்து வருடங்களுக்கு முன்பு வெளியிடப்பட்ட இந்த திரைப்படம் ரசிகர்களிடையே பெரிதாக வரவேற்பை பெற்றது. இந்தப் படம் வெளியான முதல் “பாகுபலியை யார் கொன்றார்கள்” என்ற கேள்வி பெரும் சர்ச்சையாக ரசிகர்களிடையே பரவியது.
எஸ்எஸ் ராஜமவுலி இயக்கத்தில் உருவான இந்த பிரம்மாண்ட திரைப்படத்தில் பிரபாஸ், ராணா டகுபதி, அனுஷ்கா, தமன்னா, நாசர், ரம்யா கிருஷ்ணன், சத்யராஜ் என பெரிய நட்சத்திர பட்டாளமே நடித்திருந்தார்கள்.
இந்தப் படம் தமிழ், தெலுங்கு என இரு மொழிகளில் உருவானது, அதுமட்டுமின்றி மலையாளம், ஹிந்தி ஆகிய மொழிகளில் டப் செய்யப்பட்டு வெளியிடப்பட்டது. இந்தப் படத்தை ஆர்கா மீடியா ஒர்க்ஸ் தயாரிப்பு நிறுவனம் தயாரித்தது.
இந்த படத்திற்கு எம்எம் கீரவாணி இசையமைத்திருந்தார். கேகே.செந்தில்குமார் ஒளிப்பதிவில் இந்தப் படத்தின் காட்சிகள் வியக்கத்தக்கதாக அமைந்தது. இந்த படத்தின் இரண்டாம் பாகம் 2017 ஆம் ஆண்டு வெளியிடப்பட்டது.
இந்தப்படம் 180 கோடி செலவில் எடுக்கப்பட்டது. அதிக பட்ஜெட்டில் எடுக்கப்பட்ட முதல் இந்திய திரைப்படம் என்ற பெருமையை இந்த படம் பெற்றது. பழங்காலத்தில் வாழ்ந்த சிவகாமி என்ற அரசி பற்றியும் அவள் காப்பாற்றி வந்த குழந்தையை ஒரு கிராமத்தில் இருக்கும் தம்பதியர் எடுத்து வளர்த்தது குறித்தும் கதைக்கரு இந்த படத்தில் நகர்ந்திருக்கும்.
இந்த படத்தின் முதல் பாகத்தில் பாகுபலியை யார் கொன்றார்கள் என்ற கேள்வியும், இரண்டாம் பாகத்தில் கட்டப்பா ஏன் பாகுபலியை கொன்றார் என்றும் அந்த கேள்விக்கு பதிலை கொடுத்திருந்தார் இயக்குனர்.
இந்த கட்டப்பா கதாபாத்திரத்தில் பிரபல நடிகர் சத்யராஜ் நடித்திருந்தார். ஆனால் முதலில் இந்த கதாபாத்திரத்தில் நடிப்பதற்கு நடிகர் சஜ்சய்தத்தை தான் தேர்வு செய்திருந்தார்களாம். ஆனால் அவர் சிறையில் இருந்தால், வெளியில் கொண்டுவர முயற்சி செய்தும் முடியாமல் போனதால், இந்த கதாபாத்திரத்தில் சத்யராஜை நடிக்க வைக்கலாம் என்று முடிவு செய்தார்கள் என்று இந்தப் படத்தின் கதையாசிரியர் விஜயேந்திர பிரசாத் தற்போது தெரிவித்துள்ளார்.
