மலையாளத்தில் ஹிட்டான படம்… ரீமேக்கில் ‘பிக் பாஸ்’ தர்ஷன் – லாஸ்லியா!

தமிழ் திரையுலகில் இயக்குநர்கள் தாங்களே கற்பனையாக யோசித்த ஐடியாவை டெவலப் செய்து கதை, திரைக்கதை, வசனம் எழுதி இயக்கும் படங்கள் ஒரு புறம் சூப்பர் ஹிட்டாகிறது. இன்னொரு புறம் மற்ற மொழிகளில் மெகா ஹிட்டான படங்களின் ரீமேக் ரைட்ஸை வாங்கி தமிழுக்கு ஏற்றவாறு சில மாற்றங்களை மட்டுமே செய்து இயக்கும் படங்களுக்கும் நல்ல வரவேற்பு கிடைத்து வருகிறது.

மலையாள திரையுலகில் 2019-ஆம் ஆண்டு வெளியான படம் ‘ஆண்ட்ராய்டு குஞ்சப்பன் வெர்ஷன் 5.25’. இந்த படத்தை இயக்குநர் ரதீஷ் பாலகிருஷ்ணன் பொடுவால் இயக்கியிருந்தார். இதில் சூரஜ் வெஞ்சரமூடு, சௌபின் சாஹிர், சைஜூ குருப் மற்றும் பலர் நடித்திருந்தனர். இந்த படம் மலையாளத்தில் மெகா ஹிட்டானது. தற்போது, இப்படம் தமிழில் ‘கூகுள் குட்டப்பன்’ என்ற டைட்டிலில் ரீமேக்காகவுள்ளதாக தகவல் கிடைத்துள்ளது.

இதில் கே.எஸ்.ரவிக்குமார், ‘பிக் பாஸ்’ மூலம் ஃபேமஸான தர்ஷன் – லாஸ்லியா, யோகி பாபு ஆகியோர் நடிக்க உள்ளனர். இந்த படத்தை இயக்குநர்கள் சபரி – சரவணன் இணைந்து இயக்க உள்ளனர். ஜிப்ரான் இதற்கு இசையமைக்க உள்ளார். இன்று (ஜனவரி 28-ஆம் தேதி) இந்த படத்துக்கான பூஜை போடப்பட்டதாம். இதன் ஷூட்டிங்கை வருகிற பிப்ரவரி 15-ஆம் தேதி முதல் ஆரம்பிக்க ப்ளான் போட்டுள்ளனர்.