‘கொரோனா’ பாதிப்பு… ‘அசுரன்’ பட நடிகர் நிதிஷ் வீரா காலமானார்!

சமீப காலமாக தொடர்ச்சியான மரணங்கள் ரசிகர்களுக்கும், திரையுலகினருக்கும் அதிர்ச்சியைத் தருகிறது. பிரபல பின்னணி பாடகர் எஸ்.பி.பாலசுப்ரமணியம், பிரபல காமெடி நடிகர்கள் விவேக் – பாண்டு – நெல்லை சிவா – மாறன், பிரபல இயக்குநர்கள் எஸ்.பி.ஜனநாதன் – தாமிரா, பிரபல ஒளிப்பதிவாளரும், இயக்குநருமான கே.வி.ஆனந்த் என ரசிகர்களுக்கும், திரையுலக பிரபலங்களுக்குமே பிடித்தமான நபர்களின் இழப்பு அதிர்ச்சியளிக்கிறது.

இந்த சூழலில் இன்னொரு மரணச் செய்தி வந்திருக்கிறது. ‘புதுபேட்டை, பேரரசு, வெண்ணிலா கபடிகுழு 1 & 2, சிந்தனை செய், படைவீரன், காலா, பேரன்பு, ஐரா, நீயா 2, ராட்சசி, அசுரன்’ ஆகிய படங்களில் மிக முக்கிய ரோலில் நடித்தவர் பிரபல நடிகர் நிதிஷ் வீரா. தற்போது, ‘லாபம்’ என்ற புதிய படத்தில் நடித்திருக்கிறார்.

‘மக்கள் செல்வன்’ விஜய் சேதுபதி ஹீரோவாக நடித்திருக்கும் இந்த படம் ரிலீஸுக்கு தயாராக இருக்கிறது. இந்நிலையில், கொரோனாவால் பாதிக்கப்பட்டு மருத்துவமனையில் சிகிச்சை பெற்று வந்த நடிகர் நிதிஷ் வீரா, இன்று சிகிச்சை பலனின்றி இயற்கை எய்தினார் என்று தகவல் கிடைத்துள்ளது. இவரது மறைவுக்கு திரையுலகினர் பலர் சமூக வலைத்தளங்களில் இரங்கல் தெரிவித்து வருகின்றனர்.