தமிழ் சினிமாவின் முன்னணி நடிகர்களில் ஒருவரான சிலம்பரசன் நடிப்பில் கடைசியாக வெளிவந்த திரைப்படம் சுந்தர்.சி இயக்கத்தில் வெளியான “வந்தா ராஜாவா தான் வருவேன்”.
இதை தொடர்ந்து சிம்பு கௌதம் வாசுதேவ் மேனன் இயக்கத்தில் ஒரு குறும்படத்தில் நடித்திருந்தார். “கார்த்திக் டயல் செய்த எண்” என்ற இந்த குறும்படம் இவரின் “விண்ணைத்தாண்டி வருவாயா” படத்தின் சிக்வலாக எடுக்கப்பட்டது.
தற்போது இவர் சுசீந்திரன் இயக்கத்தில் “ஈஸ்வரன்’ என்ற திரைப்படத்தில் நடித்து வருகிறார். இந்தப் படத்தின் புது லுக் வெளியாகி ஏற்கனவே இணையதளத்தில் வைரலாகி வருகிறது. இதுமட்டுமின்றி இவர் வெங்கட் பிரபு இயக்கத்தில் “மாநாடு” என்ற திரைப்படத்திலும் நடிக்கிறார்.
இதற்கு முன்னர் நடிகை ஓவியா நடிப்பில் வெளியான “90எம்எல்” படத்தில் கவுரவ தோற்றத்தில் நடித்திருந்த சிம்பு, நடிகை ஹன்சிகா நடிப்பில் அடுத்து வெளிவரவிருக்கும் “மகா” என்ற படத்திலும் கவுரவ தோற்றத்தில் நடித்திருக்கிறார்.
ஹன்சிகாவின் 50-வது திரைப்படமான “மகா” திரைப்படத்தின் படப்பிடிப்பு தற்போது முழுமையாக முடிந்துவிட்டதாகவும், விரைவில் இந்த படத்தின் அடுத்தடுத்த தகவல்கள் வெளியாகும் எனவும் தற்போது செய்தி வெளியாகியுள்ளது. ஹன்சிகா மற்றும் சிம்பு இணைந்து நடித்திருக்கும் இந்த திரைப்படத்தின் வெளியீட்டுக்காக இவரது ரசிகர்கள் ஆவலாக காத்திருக்கிறார்கள்.
