சூர்யா பிறந்தநாளையொட்டி குவியும் வாழ்த்துகள்!

தமிழ் சினிமாவின் முன்னணி நடிகர்களில் ஒருவரான சூர்யா இன்று தனது 45வது பிறந்தநாளை கொண்டாடுகிறார். இவரின் பிறந்தநாளையொட்டி இணையதளம் முழுவதும் அவரது ரசிகர்கள் மற்றும் நண்பர்கள் வாழ்த்துக்களை குவித்து வருகிறார்கள்.

1997 ஆம் வருடம் வசந்த் இயக்கத்தில் மணி ரத்னம் தயாரிப்பில் வெளியான “நேருக்குநேர்” படத்தின் மூலம் தமிழ் திரையுலகிற்கு அறிமுகப்படுத்தப்பட்டார் சூர்யா.

ஒரு சுவாரஸ்யமான தகவல் என்னவென்றால் இவருக்கு சூர்யா என்ற பெயரை மணிரத்னம் தான் வைத்துள்ளார். இவரது இயற்பெயர் சரவணன். அதுமட்டுமின்றி 1995 ஆம் வருடம் “ஆசை”யெனும் வசந்த் படத்தில் நடிப்பதற்கு இவரை அணுகியதாகவும், நடிப்பில் அவ்வளவாக ஆர்வம் இல்லாததால் இதை நடிகர் சூர்யா நிராகரித்ததாகவும் கூறப்படுகிறது.

இவரின் முதல் படமான “நேருக்கு நேர்” படத்தில் நடிகர் விஜய்யுடன் நடித்தார் என்பது குறிப்பிடத்தக்கது. பிறகு முன்னணி ஹீரோக்களுடன் நடித்து வந்த சூர்யா, 1999ஆம் வருடம் “பூவெல்லாம் கேட்டுப்பார்” எனும் படத்தில் நடிகை ஜோதிகாவுடன் இணைந்து ஹீரோவாக நடித்தார்.

இதைத்தொடர்ந்து 2001ம் வருடம் சித்திக் இயக்கத்தில் வெளியான “பிரண்ட்ஸ்” படத்தில் நடிகர் விஜய்யுடன் நடித்த சூர்யா இந்தப் படத்தில் அவரது நடிப்பிற்காக பெரிதும் பாராட்டப்பட்டார்.

ஆரம்பகாலத்தில் நம்பிக்கையின்மை, நடனம் மற்றும் சண்டை பயிற்சியில் அனுபவம் இல்லாததால் நடிப்பில் அதிக சிரமத்திற்கு உள்ளானேன் என்று கூறிய சூர்யாவிற்கு குணச்சித்திர நடிகரான ரகுவரன் தான் நம்பிக்கை கொடுத்தாராம்.

பின்பு இயக்குனர் பாலா இயக்கத்தில் வெளியான “நந்தா” திரைப்படம்தான் நடிகர் சூர்யாவுக்கு ஒரு மைல்கல்லாக அமைந்தது. இந்த படத்தில் அவரது சிறந்த நடிப்பிற்காக பெரிய பாராட்டுகளைப் பெற்றார்.தமிழ்நாடு மாநில அரசின் சிறந்த நடிகருக்கான விருதை பெற்றார்.

இதை தொடர்ந்து விக்ரமன் இயக்கத்தில் “உன்னைநினைத்து” மற்றும் அமீர் இயக்கத்தில் “மௌனம் பேசியதே” ஆகிய திரைப்படங்கள் மூலம் தனக்கென பெரிய ரசிகர் கூட்டத்தை பெற்றார் நடிகர் சூர்யா.

அதில் தொடங்கி கௌதம் வாசுதேவ் மேனன் இயக்கத்தில் காக்க காக்க, பாலா இயக்கத்தில் பிதாமகன், பேரழகன், கஜினி, சில்லுனு ஒரு காதல், வாரணம் ஆயிரம், அயன், சிங்கம், ஏழாம் அறிவு, 24, காப்பான், என் ஜி கே போன்ற வெற்றி படங்களில் நடித்து தமிழ் சினிமாவில் நீங்காத இடத்தை பிடித்துள்ளார்.

இவர் நடிகை ஜோதிகாவை 2006 ஆம் ஆண்டு காதலித்து திருமணம் செய்து கொண்டார்.இவர்களுக்கு தியா, தேவ் என இரண்டு குழந்தைகள் உள்ளனர்.அவர்களின் பெயரையொட்டியே “2டி” என்று தங்கள் தயாரிப்பு நிறுவனத்திற்கு பெயரிட்டுள்ளனர்.

தற்போது சூர்யா சுதா கொங்கரா இயக்கத்தில் “சூரரைப்போற்று” என்ற படத்தில் நடித்துள்ளார். இந்தப்படத்தை இவரது தயாரிப்பு நிறுவனமான 2டி நிறுவனமே தயாரித்துள்ளது. இந்த படத்தை சூர்யாவின் ரசிகர்கள் எதிர்பார்த்து காத்திருக்கிறார்கள்.

இன்று பிறந்தநாளை கொண்டாடும் சூர்யாவிற்கு அவரது ரசிகர்கள் மற்றும் சினிமா பிரபலங்கள் வாழ்த்துக்களை இணையதளத்தில் குவித்து வருகிறார்கள்‌.