தமிழ் சினிமாவில் சூப்பர் ஸ்டார் ரஜினிகாந்த், கமல்ஹாசன், விஜய் , விக்ரம் தொடங்கி காமெடி நடிகரான சந்தானம் வரை பலரும் தங்களது திரைப்படங்களில் பெண் வேடமிட்டு நடித்து அசத்தியுள்ளனர்.
இந்தப் பட்டியலில் முதலிடம் பிடித்தவர் நடிகர் கமல், இவர் 1996 ஆம் ஆண்டு கே.எஸ்.ரவிக்குமார் இயக்கத்தில் வெளிவந்த “அவ்வை சண்முகி” என்ற படத்தில் இரு வேடங்களில் நடித்துள்ளார். நடிகை மீனாவின் ஜோடியாக ஒரு வேடத்திலும், அவர்களின் குழந்தையை பார்த்துக்கொள்ளும் பாட்டியான’அவ்வை சண்முகி’யாக பெண் வேடமிட்டு நடித்திருப்பார். மேலும் இவர், மீண்டும் கே.எஸ் .ரவிக்குமார் இயக்கத்தில் 2008 ஆம் ஆண்டு வெளிவந்த” தசாவதாரம்” திரைப்படத்தில் மூதாட்டி கிருஷ்ணவேணி பாட்டியாக வேடமிட்டு அசத்தியிருப்பார்.
இவரைத் தொடர்ந்து சூப்பர் ஸ்டார் ரஜினிகாந்த்,1990 ஆம் ஆண்டு வெளிவந்த “பணக்காரன்” மற்றும் சங்கர் இயக்கத்தில் வெளிவந்த “எந்திரன்” ஆகிய படங்களின் பாடல்களில் சில காட்சிகளுக்கு பெண் வேடமிட்டு நடனமாடியிருப்பார்.
இவரைப்போலவே தளபதி விஜய், கே. செல்வபாரதி இயக்கத்தில் 2000 ஆண்டு வெளிவந்த “பிரியமானவளே” படத்தின் ஒரு பாடலில் நடிகை சிம்ரனுடன் பெண் வேடமிட்டு ஆடியிருப்பார்.
நடிகர் சூர்யா, 2009ம் ஆண்டு கே.வி.ஆனந்த் இயக்கத்தில் வெளியான “அயன்” திரைப்படத்தில் ‘ பலபலக்குற பகலா நீ’ என்ற பாடலில் பெண் வேடமிட்டு விமான நிலையத்தில் ஏமாற்றி தப்பித்திருப்பார்.
நடிகர் விஷால், 2011ஆம் ஆண்டு பாலா இயக்கத்தில் வெளியான “அவன் இவன்” படத்தில் பெண் வேடமிட்டுருப்பார் .இந்த படத்தில் இவர் வேடத்திற்காக பல பாராட்டுகளைப் பெற்றார்.
இவர்களை தொடர்ந்து நடிகர் சிவகார்த்திகேயன், 2016 ஆம் ஆண்டு வெளியான “ரெமோ” படத்தில் பெண் நர்ஸான ‘ரெஜினா மோத்வானி’ என்ற வேடத்தில் நடித்து அசத்தியிருப்பார்.
இவர்களைப் போல நடிகர் சந்தானம், 2013 ஆம் ஆண்டு வெளிவந்த “ஆல் இன் ஆல் அழகு” ராஜா என்ற படத்தில் ‘கரீனா சோப்ரா’ என்ற பெண் வேடத்தில் நடிகர் கார்த்திக்குடன் நடித்திருப்பார். இந்த படத்தின் நகைச்சுவை காட்சிகள் இந்த வேடத்திற்காக பிரபலமானது.
குணச்சித்திர நடிகரான விஜய் சேதுபதி சமீபத்தில் வெளியாகி வெற்றிபெற்ற” சூப்பர் டீலக்ஸ்” திரைப்படத்தில் ‘ சில்பா அக்கா’ என்ற கதாபாத்திரத்தில் பெண் வேடமிட்டு திருநங்கையாக நடித்திருப்பார்.
மேலும் இந்த நடிகர்களைப் போலவே நடிகர் சத்யராஜ் ,பிரசாந்த், காமெடி நடிகர் விவேக் போன்றோரும் பெண் வேடமிட்டு தங்கள் நடிப்பில் அசத்தியுள்ளனர்.
