தமிழ் திரைப்பட தயாரிப்பாளர்கள் சங்க வேலைகளில் தாமதம் ஏற்பட்டதால் புதிய முயற்சியாக திரைப்பட தயாரிப்பாளர்கள் சங்கம் தேர்தல் வேலைகளில் ஈடுபட்டது. அது முதலே பலவிதமான சிக்கல்களும் மோதல்களும் இருந்து வந்தது.
இந்த மோதல் அவ்வப்போது பரபரப்பை ஏற்படுத்தி தற்போது ஆக்டிவாக இருக்கும் தயாரிப்பாளர்கள் மற்றும் முன்னாள் தயாரிப்பாளர்கள் என்று அவர்களுக்குள் கருத்து வேறுபாடுகள் நிகழ்ந்தது.
இந்நிலையில் சமீபத்தில் பாரதிராஜா ஒரு அறிக்கை வெளியிட்டுள்ளார். இந்த அறிக்கையில் தமிழ் திரைப்பட தயாரிப்பாளர்கள் சங்கத்திலிருந்து கிளையாக தமிழ் திரைப்பட நடப்பு தயாரிப்பாளர் சங்கம் உருவாக்கியுள்ளதாக செய்தி வெளியிட்டுள்ளார்.
இதனால் கடந்த சில வாரங்களாக தயாரிப்பாளர்களுக்கு மத்தியில் சலசலப்பு எழுந்தது. ஏற்கனவே தயாரிப்பாளர் சங்கத்தில் பல பிரச்சனைகள் நிகழ்ந்து வரும் இந்த நேரத்தில் இப்படி தனி சங்கம் அமைப்பது மேலும் பிரச்சனையை தூண்டும் என்று பலர் தங்கள் கருத்துக்களை வெளியிட்டுள்ளார்கள்.
மேலும் பாரதிராஜா இந்த சங்கத்தை கலைத்து கொள்வது நல்லது என்றும் எதிர்ப்பு தெரிவித்து வருகிறார்கள். இதுதொடர்பாக கலைப்புலி.எஸ்.தாணு செய்தியாளர்களை சந்தித்துப் பேசுகையில், ஏற்கனவே பிரச்சனையில் இருக்கும் தயாரிப்பாளர் சங்கத்தில் இப்படி ஒரு முடிவை பாரதிராஜா எடுத்தது தேவையில்லாத பிரச்சனையை தான் உண்டாக்கும் என்று கூறியுள்ளார். மேலும் தயாரிப்பாளர் ராதாகிருஷ்ணன் தமிழ் தயாரிப்பாளர் சங்கத்தின் தாய் சங்கத்திலிருந்து பிரித்து செல்வதற்கான முதல் கட்டமே இந்த தனி சங்கம் அமைப்பது என்றும், தயாரிப்பாளர் வி.சேகர் இதனால் தமிழ் சினிமா பின்னுக்கு தள்ளப்படும் நிலைமை ஏற்பட்டு விடலாம் என்றும் தங்கள் கருத்துக்களை கூறியுள்ளார்கள்.
மேலும் கலைப்புலி.எஸ்.தாணு, எம்ஜிஆர் மற்றும் ஜெயலலிதா நடித்துக் கொண்டிருந்த சமயத்தில் ஆரம்பித்ததுதான் இந்த சங்கம் இதை கலைப்பதற்கான எந்த தேவையும் இல்லை. தற்போது இந்த சங்கத்தை கலைத்துவிட்டு பாரதிராஜா திரும்ப வந்தால் அவரை இந்த சங்கத்தின் பொதுச் செயலாளராக அனைவரும் மரியாதையுடன் ஏற்றுக் கொள்வோம். அவர் மேல் எங்களுக்கு அதிக மதிப்பு உள்ளது என்று குறிப்பிட்டுள்ளார்.
இவர்கள் மட்டுமின்றி வேறு சில தயாரிப்பாளர்களும் இந்த சங்கத்தை கலைக்க வேண்டி தங்கள் கருத்துக்களை கூறி வருகிறார்கள்.
