தமிழ் சினிமாவில் பாப்புலர் இயக்குநராகவும், நடிகராகவும் வலம் வந்தவர் மாரிமுத்து. இயக்குநர்கள் ராஜ்கிரண், மணிரத்னம், வசந்த், சீமான், எஸ்.ஜே.சூர்யா ஆகியோரிடம் உதவி இயக்குநராக பணியாற்றிய இவர் இயக்குநராக அறிமுகமாகிய முதல் படம் ‘கண்ணும் கண்ணும்’.
இதில் ஹீரோவாக பிரசன்னா நடித்திருந்தார். அதன் பிறகு மாரிமுத்து ‘புலிவால்’ என்ற படத்தை இயக்கினார். இந்த படத்தில் பிரசன்னா – விமல் இணைந்து நடித்திருந்தனர்.
பின், ‘யுத்தம் செய், நிமிர்ந்து நில், ஜீவா, கொம்பன், கிருமி, மருது, பைரவா, கடைக்குட்டி சிங்கம், பரியேறும் பெருமாள், சண்டக்கோழி 2, Mr.லோக்கல், சுல்தான், டாக்டர், விக்ரம், மாயோன், கண்ணை நம்பாதே, ஜெயிலர்’ போன்ற பல படங்களிலும், ‘எதிர் நீச்சல்’ என்ற சன் டிவி சீரியலிலும் நடித்து ரசிகர்களிடம் அப்ளாஸ் வாங்கியிருந்தார்.
கடந்த செப்டம்பர் 8-ஆம் தேதி நடிகர் மாரிமுத்து (வயது 57) மாரடைப்பால் இயற்கை எய்தினார். அதன் பிறகு ‘எதிர் நீச்சல்’ சீரியலில் இவர் நடித்து வந்த ‘ஆதி குணசேகரன்’ ரோலில் பிரபல எழுத்தாளரும், நடிகருமான வேல ராமமூர்த்தி நடிக்கவிருப்பதாக சொல்லப்பட்டது. தற்போது, அந்த ரோலில் நடிக்க பாப்புலர் நடிகர்களில் ஒருவரான பசுபதியிடம் பேச்சு வார்த்தை நடைபெற்று வருவதாக தகவல் கிடைத்துள்ளது.
