2007 ஆம் ஆண்டு வெங்கட்பிரபு இயக்கத்தில் வெளியான “சென்னை 28” படத்தில் நடித்ததன் மூலம் புகழ் பெற்றவர் நடிகர் மிர்ச்சி சிவா. தனது வித்தியாசமான காமெடியால் மக்கள் மனதில் நீங்காத இடத்தை தற்போது பிடித்துள்ளார்.
இந்த படத்தை தொடர்ந்து சரோஜா, தமிழ்படம், வா, பதினாறு, கோ, கலகலப்பு, தில்லு முல்லு, சொன்னா புரியாது போன்ற படங்களில் நடித்து வந்த மிர்ச்சி சிவா கடைசியாக “தமிழ் படம் 2” என்ற படத்தில் நடித்திருந்தார்.
இவர் தன் நகைச்சுவை திறமையால் ரசிகர்களை தன் வசம் வைத்துள்ளார் என்று சொன்னால் அது மிகையாகாது. தற்போது அவர் வேல்ஸ் பிலிம்ஸ் இன்டர்நேஷனல் தயாரிப்பில் “சுமோ” என்ற படத்திலும் வெங்கட்பிரபு இயக்கத்தில் வெளியாகவுள்ள “பார்ட்டி” என்ற திரைப்படத்திலும் நடித்து வருகிறார்.
தற்போது மிர்ச்சி சிவா தில்லுக்கு துட்டு படத்தின் இயக்குனர் ராம்பாலாவுடன் ஒரு காமெடி திரைப்படத்தில் நடிக்கவுள்ளதாக செய்தி வந்துள்ளது. மேலும் இந்த படத்தை ஸ்கிரீன் சீன் என்டர்டைன்மென்ட் தயாரிப்பதாகவும் இந்த படம் ஹாரர் ஜானரில் உருவாக்கப்படவுள்ளதாகவும் தற்போது செய்தி வந்துள்ளது. எனினும் இதற்கான அதிகாரப்பூர்வமான தகவல் இன்னும் வெளியாகவில்லை. தற்போது மிர்ச்சி சிவா அடுத்தடுத்த படங்களில் கமிட்டாகி படு பிஸியாக இருக்கிறாராம்.
