சமீப காலமாக தொடர்ச்சியான மரணங்கள் ரசிகர்களுக்கும், திரையுலகினருக்கும் அதிர்ச்சியைத் தருகிறது. பிரபல பின்னணி பாடகர் எஸ்.பி.பாலசுப்ரமணியம், பிரபல காமெடி நடிகர்கள் விவேக் – பாண்டு – நெல்லை சிவா – மாறன், பிரபல இயக்குநர்கள் எஸ்.பி.ஜனநாதன் – தாமிரா, பிரபல ஒளிப்பதிவாளரும், இயக்குநருமான கே.வி.ஆனந்த், கன்னட நடிகர் புனித் ராஜ்குமார், பாடகி லதா மங்கேஷ்கர் என ரசிகர்களுக்கும், திரையுலக பிரபலங்களுக்குமே பிடித்தமான நபர்களின் இழப்பு அதிர்ச்சியளிக்கிறது.
இந்த சூழலில் இன்னொரு மரணச் செய்தி வந்திருக்கிறது. சினிமாவில் பிரபல பின்னணி இசையமைப்பாளராக வலம் வந்தவர் பப்பி லஹரி. 69 வயதான இசையமைப்பாளர் பப்பி லஹரி ஹிந்தி, பெங்காலி, தெலுங்கு, கன்னடம், குஜராத்தி ஆகிய மொழிகளில் பல படங்களுக்கு இசையமைத்ததோடு, பல சூப்பர் ஹிட் பாடல்களை பாடியும் ரசிகர்களிடம் லைக்ஸ் குவித்திருக்கிறார்.
இவர் தமிழ் மொழியில் ‘அபூர்வ சகோதரிகள், கிழக்கு ஆப்பிரிக்காவில் ஷீலா, பாடும் வானம்பாடி’ ஆகிய படங்களுக்கு இசையமைத்திருக்கிறார். தற்போது, இசையமைப்பாளரும், பாடகருமான பப்பி லஹரி உடல்நலக்குறைவால் இயற்கை எய்தினார் என தகவல் கிடைத்துள்ளது. இவரது மறைவுக்கு திரையுலகினர் பலர் சமூக வலைத்தளங்களில் இரங்கல் தெரிவித்து வருகின்றனர்.
