ரஜினியுடன் கைகோர்க்கும் ‘வாரிசு’ தயாரிப்பாளர் தில் ராஜு… படத்தை இயக்கப்போவது யார் தெரியுமா?

தமிழ் சினிமாவில் மட்டுமின்றி இந்திய திரையுலகமே வியந்து பார்க்கும் அளவுக்கு பல சாதனைகள் செய்து மக்கள் மனதிலும் எப்பவும் சூப்பர் ஸ்டாராக வலம் வரும் ஒரே நடிகர் ரஜினிகாந்த் தான். இப்போது இவர் நடிப்பில் ‘ஜெயிலர், லால் சலாம்’ மற்றும் இயக்குநர் த.செ.ஞானவேல் படம் என மூன்று படங்கள் லைன் அப்பில் இருக்கிறது.

ரஜினியின் 169-வது படமான ‘ஜெயிலர்’-ஐ பாப்புலர் இயக்குநர்களில் ஒருவரான நெல்சன் இயக்குகிறார். ‘சன் பிக்சர்ஸ்’ நிறுவனம் தயாரிக்கும் இந்த படத்துக்கு அனிருத் இசையமைக்கிறார்.

‘லால் சலாம்’ படத்தை ரஜினியின் மகள் ஐஸ்வர்யா இயக்குகிறார். இதில் விஷ்ணு விஷால் – விக்ராந்த் இணைந்து நடிக்க, ரஜினிகாந்த் சிறப்பு தோற்றத்தில் வலம் வரவிருக்கிறாராம். இவ்விரண்டு படங்களின் ஷூட்டிங்கும் பரபரப்பாக நடைபெற்று வருகிறது.

இந்நிலையில், ரஜினியின் புதிய படத்தை விஜய்யின் ‘வாரிசு’ தயாரிப்பாளர் தில் ராஜு தனது ‘ஸ்ரீ வெங்கடேஸ்வரா கிரியேஷன்ஸ்’ மூலம் தயாரிக்கவுள்ளதாக தகவல் கிடைத்துள்ளது. இந்த படத்தை பிரபல தெலுங்கு இயக்குநர் பாபி கொல்லி இயக்கவுள்ளாராம். இவர் சமீபத்தில் சிரஞ்சீவி நடிப்பில் வெளியாகி ஹிட்டான ‘வால்டர் வீரய்யா’ படத்தை இயக்கியிருந்தது குறிப்பிடத்தக்கது.