‘சூப்பர் ஸ்டார்’ ரஜினிகாந்த் போலீஸாக மாஸ் காட்டிய ‘தர்பார்’ படம் கடந்த ஆண்டு (2020) தொடக்கத்தில் வெளியானது. இந்த படத்துக்கு பிறகு ரஜினி எந்த இயக்குநருடன் கூட்டணி அமைக்கப்போகிறார் என்ற எதிர்பார்ப்பு இருந்தது. பின், இயக்குநர் சிவாவின் இயக்கத்தில் தான் ரஜினி நடிக்கப்போகிறார் என்று உறுதிசெய்யப்பட்டது. இந்த படத்தை தயாரிப்பது ‘சன் பிக்சர்ஸ்’ என்பதால், படத்தின் ஒவ்வொரு அப்டேட்டும் ரஜினியின் ‘முத்து’ பட வசனம் போல் எப்போ வரும்னு சொல்லாம, வரவேண்டிய நேரத்துல கரெக்ட்டா வந்தது.
படத்தின் டைட்டிலே ‘அண்ணாத்த’ என்று திடீரென அறிவித்து விட்டார்கள். மேலும், படத்தில் மீனா, கீர்த்தி சுரேஷ், குஷ்பூ, ‘லேடி சூப்பர் ஸ்டார்’ நயன்தாரா என ஹீரோயின்கள் பட்டாளமே நடிக்கிறது. இந்த படத்தின் ரிலீஸுக்காக ‘சூப்பர் ஸ்டார்’ ரஜினிகாந்தின் ரசிகர்கள் பல மாதங்களாக வெயிட் பண்ணிக் கொண்டிருக்கிறார்கள். சமீபத்தில், இப்படத்தை இந்த ஆண்டு (2021) நவம்பர் 4-ஆம் தேதி தீபாவளி ஸ்பெஷலாக ரிலீஸ் செய்ய ப்ளான் போட்டுள்ளதாக ‘சன் பிக்சர்ஸ்’ நிறுவனமே ட்விட்டரில் அதிகாரப்பூர்வமாக அறிவித்தது.
கடந்த ஏப்ரல் 8-ஆம் தேதி இந்த படத்தின் அடுத்த ஷெடியூல் ஷூட்டிங்கில் கலந்து கொள்வதற்காக நடிகர் ‘சூப்பர் ஸ்டார்’ ரஜினிகாந்த் தனி விமானம் மூலம் ஹைதராபாத்துக்கு சென்றார். இப்படத்தின் ஷூட்டிங்கை வருகிற மே 10-ஆம் தேதிக்குள் முடிக்க இயக்குநர் சிவா திட்டமிட்டுள்ளதாக சொல்லப்படுகிறது.
இந்நிலையில், ரஜினியின் புதிய படம் தொடர்பாக ஒரு சூப்பரான தகவல் கிடைத்துள்ளது. இந்த படத்தை ‘கண்ணும் கண்ணும் கொள்ளையடித்தால்’ என்ற சூப்பர் ஹிட் படத்தை இயக்கிய இயக்குநர் தேசிங் பெரியசாமி தான் இயக்க உள்ளாராம். தேசிங் பெரியசாமி கூறிய கதை ரஜினிக்கு மிகவும் பிடித்து விட்டதாம். ‘கண்ணும் கண்ணும் கொள்ளையடித்தால்’ படம் வெளியானபோதே, அப்படத்தை பார்த்துவிட்டு இயக்குநர் தேசிங்கை ரஜினி வெகுவாக பாராட்டியதுடன் “தனக்கும் ஒரு கதை ரெடி பண்ணுங்க” என்று சொன்னது குறிப்பிடத்தக்கது.
