சினிமாவில் பாப்புலர் நடிகைகளில் ஒருவராக வலம் வருபவர் சினேகா. இவருக்கு தமிழ் மொழியில் அமைந்த முதல் படமே மாதவனுடன் தான். அது தான் ‘என்னவளே’. இந்த படத்தை இயக்குநர் ஜே.சுரேஷ் இயக்கியிருந்தார். ‘என்னவளே’ படத்துக்கு பிறகு நடிகை சினேகாவிற்கு அடித்தது ஜாக்பாட்.
அடுத்தடுத்து இவரின் கால்ஷீட் டைரியில் ‘ஆனந்தம், பார்த்தாலே பரவசம், பம்மல் கே சம்பந்தம், புன்னகை தேசம், உன்னை நினைத்து, ஏய் நீ ரொம்ப அழகா இருக்கே, விரும்புகிறேன், கிங், ஏப்ரல் மாதத்தில், வசீகரா, வசூல் ராஜா MBBS, பார்த்திபன் கனவு, ஆட்டோகிராஃப், புதுப்பேட்டை, நான் அவன் இல்லை, பிரிவோம் சந்திப்போம், கோவா, உன் சமையல் அறையில், வேலைக்காரன், பட்டாஸ்’ என தமிழ் படங்கள் குவிந்தது.
2012-ஆம் ஆண்டு பாப்புலர் நடிகர் பிரசன்னாவை காதலித்து திருமணம் செய்து கொண்டார் நடிகை சினேகா. இவர்களுக்கு ஒரு மகனும், ஒரு மகளும் உள்ளனர். இப்போது, சினேகா ‘ஷாட் பூட் 3’ என்ற தமிழ் படத்தில் நடித்து கொண்டிருக்கிறார். இந்நிலையில், சினேகாவிடம் ஒரு ஏற்றுமதி நிறுவனத்தின் நிறுவனர்களான தம்பதி, ரூ.25 லட்சம் முதலீடு செய்தால், ஒவ்வொரு மாதமும் ரூ.1.80 லட்சம் தருகிறோம் என்று கூறியுள்ளனர்.
சினேகாவும் அவர்களை நம்பி ரூ.25 லட்சத்தை கொடுத்திருக்கிறார். அதன் பிறகு 5 மாதங்கள் ஆன பிறகும் சினேகாவிற்கு வர வேண்டிய பங்குத் தொகை வரவில்லையாம். இதனைத் தொடர்ந்து அவர்களிடம் இது பற்றி போனில் பேசுகையில், அவர்கள் சினேகாவிற்கு கொலை மிரட்டல் விடுத்துள்ளனர். தற்போது, அவர்கள் மீது காவல் நிலையத்தில் சினேகா புகார் கொடுத்திருப்பதாக தகவல் கிடைத்துள்ளது.
