சினிமாவில் டாப் இயக்குநர்களில் ஒருவராக வலம் வருபவர் எஸ்.எஸ்.ராஜமௌலி. ‘பாகுபலி 1 & 2’வின் வெற்றியை தொடர்ந்து பிரம்மாண்ட படைப்பான ‘இரத்தம் ரணம் ரௌத்திரம்’ (RRR)-ஐ இயக்கியிருந்தார் எஸ்.எஸ்.ராஜமௌலி. இப்படத்தினை D.V.V. தானய்யா தனது ‘DVV எண்டர்டெயின்மெண்ட்ஸ்’ மூலம் தயாரித்திருந்தார்.
இந்த படம் தெலுங்கு மொழி மட்டுமில்லாமல் தமிழ், மலையாளம், கன்னடம் மற்றும் ஹிந்தி ஆகிய மொழிகளிலும் டப் செய்யப்பட்டு கடந்த ஆண்டு (2022) மார்ச் 25-ஆம் தேதி திரையரங்குகளில் ரிலீஸானது. இதில் தெலுங்கு திரையுலகின் டாப் ஹீரோக்களான ஜூனியர் என்.டி.ஆர், ராம் சரண் இருவரும் இணைந்து நடித்திருந்தனர்.
இப்படம் ரசிகர்களிடம் நல்ல வரவேற்பை பெற்று சூப்பர் ஹிட்டானதுடன், வசூலிலும் மிகப் பெரிய சாதனை படைத்தது. இயக்குநர் ராஜமௌலி இயக்கப்போகும் புதிய தெலுங்கு படத்தில் ‘சூப்பர் ஸ்டார்’ மகேஷ் பாபு நடிக்கவிருக்கிறார். இந்த படத்துக்கான ப்ரீ-புரொடக்ஷன் பணிகள் பரபரப்பாக நடைபெற்று வருகிறது.
இந்நிலையில், இயக்குநர் ராஜமௌலி நார்வேயில் உள்ள பல்பிட் ராக்கிற்கு தனது மனைவியுடன் சென்றுள்ளதாக தகவல் கிடைத்துள்ளது. அங்கு எடுத்த ஸ்டில்ஸ் மற்றும் வீடியோவை ராஜமௌலி இன்ஸ்டாகிராமில் வெளியிட்டதுடன், “‘மகதீரா’ படத்துக்கான ரிசர்ச்சின் போது இந்த பல்பிட் ராக்கின் புகைப்படங்களை பார்த்திருக்கிறேன். அப்போது இருந்தே இந்த இடத்துக்கு வர வேண்டும் என்று எனக்கு ஆசை இருந்தது” என்று பதிவிட்டுள்ளார்.
