முதன்முறையாக மலையாள ரீமேக்கில் இணைந்து நடிக்கும் சூர்யா – கார்த்தி

சூப்பர் ஹிட் மலையாளப் படத்தின் தமிழ் ரீமேக்கில் கார்த்தி-சூர்யா இணைந்து நடிக்க உள்ளதாக தகவல் வெளியாகி உள்ளது.

அய்யப்பனும் கோஷியும் என்ற புதிய மலையாள படம், சமீபத்தில் திரைக்கு வந்து பெரும் வெற்றி பெற்றது. இந்த படத்தில் பிருத்விராஜ், பிஜுமேனன் ஆகிய இருவரும் முன்னணி கதாபாத்திரங்களில் நடித்துள்ளனர். படத்தில் ஹீரோ வில்லன் என்று யாரும் கிடையாது, ஈகோ தான் எல்லாம். அய்யப்பனும் கோஷியும் படத்தை தமிழில் தயாரிக்கும் உரிமையை 5 ஸ்டார் கதிரேசன் வாங்கியிருக்கிறார். இப்படத்தில் முன்னணி நடிகர்களை நடிக்க வைக்க பேச்சுவார்த்தை நடத்தப்பட்டன. விஜய் சேதுபதி – தனுஷ், சரத்குமார், சசிகுமார், சிம்பு விக்ரம் ஜோடி என நிறைய வதந்திகள் வெளியாகின.

இந்நிலையில் தற்போது அந்த படத்தில் சூர்யாவும், கார்த்தியும் இணைந்து நடிக்க உள்ளதாக கூறப்படுகிறது. சகோதரர்களான இவர்கள் இருவரும் ஏற்கனவே கடைக்குட்டி சிங்கம் படத்தில் ஒரு காட்சியில் இணைந்து நடித்திருந்தனர். இப்படம் உறுதியானால், அவர்கள் இணைந்து நடிக்கும் முதல் முழுநீள படம் இதுவாக இருக்கும். ஏற்கனவே ஓடிடி சர்ச்சையில் சிக்கிய சூர்யா, இந்த படத்தில் நடித்தால் மேலும் பல சர்ச்சைகளுக்கு வழிவகுக்கும் என பலரும் கூறுவதால் தயாரிப்பாளர் தரப்பிலிருந்து தயக்கம் காட்டுவதாக கூறப்படுகிறது.