ஆஸ்கர் போட்டியில் அடுத்த கட்டத்திற்கு சென்ற ‘சூரரைப் போற்று’… கொண்டாட்டத்தில் சூர்யா ரசிகர்கள்!ஆஸ்கர் போட்டியில் அடுத்த கட்டத்திற்கு சென்ற ‘சூரரைப் போற்று’… கொண்டாட்டத்தில் சூர்யா ரசிகர்கள்!

முன்னணி நடிகர்களில் ஒருவரான சூர்யா நடித்து, தயாரித்து சமீபத்தில் OTT-யில் ரிலீஸான படம் ‘சூரரைப் போற்று’. ‘ஏர் டெக்கான்’ விமான நிறுவனர் ஜி.ஆர்.கோபிநாத்தின் வாழ்க்கையை மையமாக வைத்து கதைக்களம் அமைக்கப்பட்டுள்ள இப்படத்தை பெண் இயக்குநர் சுதா கொங்கரா இயக்கியுள்ளார். இதில் சூர்யா ‘நெடுமாறன் ராஜாங்கம்’ என்ற கேரக்டரில் வலம் வந்துள்ளார்.

அவருக்கு ஜோடியாக அபர்ணா பாலமுரளி நடித்துள்ளாராம். மேலும், டோலிவுட் நடிகர் மோகன் பாபு, பாலிவுட் நடிகர் பரேஷ் ராவல், ஊர்வசி, கருணாஸ், விவேக் பிரசன்னா, கிருஷ்ண குமார், காளி வெங்கட், அச்யூத் குமார், ஞானசம்பந்தம், வினோதினி வைத்யநாதன், ராமச்சந்திரன் துரைராஜ், ஆர்.எஸ்.சிவாஜி, ‘பூ’ ராமு ஆகியோர் மிக முக்கிய ரோல்களில் நடித்திருக்கிறார்கள்.

இந்த படத்துக்கு ஜி.வி.பிரகாஷ் குமார் இசையமைத்துள்ளார், நிகேத் பொம்மி ஒளிப்பதிவு செய்திருக்கிறார், ஜாக்கி கலை இயக்குநராகவும், சதீஷ் சூர்யா படத்தொகுப்பாளராகவும் பணியாற்றியுள்ளனர். இதற்கு ‘உறியடி’ புகழ் விஜய் குமார் வசனம் எழுதியுள்ளார். இந்த படத்தை ‘அமேசான் ப்ரைம்’ டிஜிட்டல் பிளாட்ஃபார்மில் பார்த்த ரசிகர்களும், பிரபலங்களும் பாராட்டினார்கள். சமீபத்தில், இப்படம் இந்த ஆண்டு (2021) நடைபெற உள்ள ஆஸ்கர் போட்டியின் பொதுப்பிரிவில் சிறந்த நடிகர், சிறந்த இயக்குநர், சிறந்த நடிகை, சிறந்த கதாசிரியர், சிறந்த இசையமைப்பாளர் ஆகிய பிரிவுகளில் போட்டியிட உள்ளதாக அறிவிக்கப்பட்டது.

தற்போது, அப்பிரிவில் போட்டியிட்ட பல படங்களை பார்த்த ஆஸ்கர் குழுவினர், அதிலிருந்து தேர்வாகி அடுத்த கட்டத்திற்கு சென்றுள்ள படங்களின் பட்டியலை வெளியிட்டிருக்கிறார்கள். அப்பட்டியலில் தேர்வாகியுள்ள 366 படங்களில் ‘சூரரைப் போற்று’ படமும் இடம்பெற்றுள்ளதாக தகவல் கிடைத்துள்ளது. இந்த பட்டியலில் இருக்கும் படங்களை வாக்குப்பதிவின் மூலம் தேர்வு செய்து இறுதிப்பட்டியலை அறிவிப்பார்கள். வருகிற மார்ச் 5-ஆம் தேதி முதல் மார்ச் 10-ஆம் தேதி வரை வாக்குப்பதிவு நடைபெறுமாம். அதன் பிறகு மார்ச் 15-ஆம் தேதி இறுதிப்பட்டியலை அறிவிக்குமாம் ஆஸ்கர் குழு.