வடிவேலு – சுராஜ் கூட்டணியில் உருவாகும் ‘நாய் சேகர் ரிட்டர்ன்ஸ்’… எக்ஸ்பெக்டேஷன் லெவலை எகிற வைத்த ஃபர்ஸ்ட் லுக்!

‘காமெடி’ என்று சொன்னாலே வடிவேலுவின் பெயர் தான் டக்கென நினைவுக்கு வரும். அந்த அளவுக்கு அவரின் காமெடி காட்சிகள் நம் மனதில் பதிந்து விட்டது. நமது வாழ்க்கையிலும், படங்களில் வடிவேலு பேசிய பல வசனங்களை சூழ்நிலைக்கு தகுந்தாற்போல் தினமும் நம்மை அறியாமல் பேசிக் கொண்டே தான் இருக்கிறோம்.

சமீபத்தில், புதிய காமெடி படத்துக்காக நடிகர் வடிவேலுவும் – இயக்குநர் சுராஜும் மீண்டும் கூட்டணி அமைக்கப்போகின்றனர் என்றும், இதற்கு ‘நாய் சேகர்’ என டைட்டில் சூட்டப்பட்டிருப்பதாகவும் அதிகாரப்பூர்வ அறிவிப்பு வந்தது. இதனைத் தொடர்ந்து இதே டைட்டிலை தான் பிரபல காமெடி நடிகர் சதீஷ் ஹீரோவாக நடிக்கும் புதிய படத்துக்கும் வைத்துள்ளதாக தகவல் கிடைத்தது. மேலும், இந்த படத்தை தயாரிக்கும் ‘AGS எண்டர்டெயின்மெண்ட்’ நிறுவனம் ‘நாய் சேகர்’ டைட்டிலை பதிவு செய்து வைத்திருந்ததாகவும் சொல்லப்பட்டது.

இது தொடர்பாக வடிவேலுவே ‘AGS’ தரப்பிடம் பேசியிருக்கிறார், அப்போது அவர்கள் “இந்த டைட்டில் எங்கள் படத்தின் கதைக்கு மிகவும் பொருத்தமாக அமைந்து விட்டது. ஆகையால், அதை கொடுக்க மாட்டோம்” என்று சொல்லி விட்டார்கள். கடந்த செப்டம்பர் 16-ஆம் தேதி சதீஷ் நடிக்கும் ‘நாய் சேகர்’ படத்தின் ஃபர்ஸ்ட் லுக் போஸ்டரை சிவகார்த்திகேயன் ட்விட்டரில் வெளியிட்டிருந்தார். கிஷோர் ராஜ்குமார் இயக்கும் இந்த படத்தில் சதீஷுக்கு ஜோடியாக பவித்ரா லக்ஷ்மி நடிக்கிறார்.

தற்போது, வடிவேலு – சுராஜ் கூட்டணியில் உருவாகும் படத்துக்கு ‘நாய் சேகர் ரிட்டர்ன்ஸ்’ என டைட்டில் சூட்டப்பட்டுள்ளதாக தகவல் கிடைத்துள்ளது. இந்த தகவலை படத்தின் தயாரிப்பு நிறுவனமான ‘லைகா புரொடக்ஷன்ஸ்’-ஏ ட்விட்டரில் அதிகாரப்பூர்வமாக அறிவித்ததுடன், படத்தின் ஃபர்ஸ்ட் லுக் போஸ்டரையும் ரிலீஸ் செய்துள்ளது. இப்படத்திற்கு சந்தோஷ் நாராயணன் இசையமைத்து வருகிறாராம்.

Vandhutanya Vandhutanya!!! 📣
🤓 Here is the First Look of all time Entertainer #Vaigaipuyal #Vadivelu in #NaaiSekarReturns@Director_suraaj @Music_Santhosh @UmeshJKumar @dharmachandru @Yuvrajganesan @proyuvraaj @teamaimpr pic.twitter.com/KoFsShV267

— Lyca Productions (@LycaProductions) October 8, 2021