‘தளபதி 69’-க்காக விஜய்யுடன் கைகோர்க்கும் சிவகார்த்திகேயன் பட இயக்குநர்… கொண்டாட்டத்தில் ரசிகர்கள்!

தமிழ் சினிமாவில் முன்னணி நடிகர்களில் ஒருவராக வலம் வருபவர் விஜய். இவரது ரசிகர்கள் ‘தளபதி’ என்று அன்போடு அழைத்து வருகிறார்கள். விஜய்யின் கடைசி படமான ‘வாரிசு’-வை வம்சி இயக்கியிருந்தார். கடந்த ஜனவரி 11-ஆம் தேதி ரிலீஸான இப்படம் திரையரங்குகளில் வெற்றிகரமாக ஓடிக் கொண்டிருக்கிறது.

‘வாரிசு’-வை தொடர்ந்து விஜய்-யின் 67-வது படமான ‘லியோ’வை ‘மாஸ்டர்’ இயக்குநர் லோகேஷ் கனகராஜ் இயக்கி வருகிறார். இந்த படத்தை ‘7 ஸ்க்ரீன் ஸ்டுடியோ’ லலித் குமார் தயாரிக்கிறார். இதன் ஷூட்டிங் பரபரப்பாக நடைபெற்று வருகிறது.

‘லியோ’வை தொடர்ந்து விஜய்யின் 68-வது படத்தை டாப் இயக்குநர்களில் ஒருவரான அட்லி இயக்கவிருக்கிறார். ரூ.400 கோடி பட்ஜெட்டில் உருவாகவிருக்கும் இந்த படத்தை ‘சன் பிக்சர்ஸ்’ நிறுவனம் தயாரிக்கவுள்ளது. தற்போது, விஜய்யின் 69-வது படம் குறித்த தகவல் கிடைத்துள்ளது.

இந்த படத்தை ‘இரும்புத்திரை, ஹீரோ, சர்தார்’ ஆகிய படங்களை இயக்கிய பி.எஸ்.மித்ரன் இயக்கவுள்ளாராம். பி.எஸ்.மித்ரன் சொன்ன கதை விஜய்-க்கு பிடித்து விட்டதால் உடனே கிரீன் சிக்னல் கொடுத்ததாக சொல்லப்படுகிறது. விரைவில் இப்படம் குறித்த அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.