‘கொரோனா’ பிரச்சனையால் திரையுலகில் அனைத்து படங்களின் படப்பிடிப்புகளும் நிறுத்தப்பட்டது, திரையரங்குகளும் மூடப்பட்டது. சமீபத்தில், சில நிபந்தனைகளுடன் திரையரங்குகளை திறக்கவும், ஷூட்டிங் எடுக்கவும் அரசாங்கம் அனுமதி கொடுத்து விட்டது. தற்போது, திரையரங்குகளில் இந்த வாரம் வெளியாகப்போகும் புதிய தமிழ் படம் தொடர்பான தகவல் கிடைத்துள்ளது.
பல முறை ரிலீஸ் தேதி அறிவிக்கப்பட்டும் பல்வேறு காரணங்களால் தள்ளிப்போய்க் கொண்டே இருந்த ‘கன்னி ராசி’ திரைப்படத்தை வருகிற டிசம்பர் 4-ஆம் தேதி ரிலீஸ் செய்ய அப்படக்குழுவினர் ப்ளான் போட்டுள்ளனர். இயக்குநர் முத்துக்குமரன் இயக்கியுள்ள இந்த படத்தில் ஹீரோவாக விமலும், ஹீரோயினாக வரலக்ஷ்மி சரத்குமாரும் நடித்துள்ளனர்.
மேலும், முக்கிய ரோல்களில் சாம்ஸ், ரோபோ ஷங்கர், காளி வெங்கட், யோகி பாபு, பாண்டியராஜன் மற்றும் பலர் நடித்துள்ளனர். ‘கிங் மூவி மேக்கர்ஸ்’ பி.ஷமீம் இப்ராஹிம் இந்த படத்தினை தயாரித்துள்ளார். பிரபல இசையமைப்பாளர் விஷால் சந்திரசேகர் இப்படத்திற்கு இசையமைத்திருக்கிறார். ஏற்கனவே, படத்தின் சேட்டிலைட் ரைட்ஸை ‘ஜீ தமிழ்’ வாங்கியிருப்பது குறிப்பிடத்தக்கது.
