கொரோனா சமயத்தில் படக்குழுவினருக்கு முழு சம்பளம் கொடுத்த விஷ்ணு…!

ராட்சசன் ஹீரோ நடிகர் விஷ்ணு விஷால் தற்போது 3 படங்களில் நடித்து வருகிறார். இந்த மூன்று படங்களின் தயாரிப்பாளரும் அவர் தான். மனு ஆனந்த் இயக்கத்தில் நடிக்கும் எப்.ஐ.ஆர்., முரளி கார்த்திக் இயக்கத்தில் மோகன்தாஸ், சிலுக்குவார்பட்டி சிங்கம் படத்தின் டைரக்டர் செல்லா இயக்கும் படம் என 3 படங்களை தயாரித்து நடிக்கிறார். கொரோனா காரணமாக சினிமாத்துறை முற்றிலுமாக முடங்கியுள்ளது. இதனால் சினிமாத்துறையின் கடைநிலை ஊழியர் முதல் சில முன்னாள் இயக்குனர்கள் வரை கடும் சிரமத்துக்குள்ளாகி வருகின்றனர். இதையறிந்த விஷ்ணு விஷால், தனது மூன்று படங்களிலும் பணிபுரியும் அனைவருக்கும் தொடர்ந்து முழு சம்பளம் கொடுத்து வருகிறார்.

இந்த தகவலை இயக்குனர் அருண் வைத்தியநாதன் தனது டிவிட்டர் தளத்தில் பதிவு செய்துள்ளார். குறிப்பிட்ட 3 படங்களில் பணியாற்றும் அனைத்து டெக்னீஷியன்கள், புரொடக்‌‌ஷன் துறையை சேர்ந்தவர்கள், அலுவலக ஊழியர்கள் ஆகியோருக்கு முழு சம்பளத்தையும் விஷ்ணு விஷால் கொடுத்திருக்கிறார். இதனால் பலரும் விஷ்ணு விஷாலுக்கு பாராட்டுகள் குவிந்து வருகிறது. பேட்மிண்டன் வீராங்கனை ஜுவாலா கட்டாவுடன் விரைவில் திருமணம் செய்யவுள்ள விஷால், தனது திருமணம் பகிரங்கமாக அனைவரின் முன்னிலையிலும் நடைபெறும் என்று ஏற்கனவே தெரிவித்திருந்தார் என்பது குறிப்பிடத்தக்கது.