மீண்டும் ஹிட் பட இயக்குநருடன் கூட்டணி.., கொண்டாட்டத்தில் கார்த்தி ரசிகர்கள்!

பிரபல நடிகர் சிவக்குமாரின் மகனாகவும், நடிகர் சூர்யாவின் தம்பியாகவும் இருந்தும் திரையுலகில் தனக்கென ஒரு ஃபார்முலாவை பிடித்து ஹிட் படங்களில் நடித்து வருகிறார் கார்த்தி. அறிமுகமான முதல் படமே மிகப் பெரிய வெற்றி பெறுவது என்பது எல்லோருக்கும் அமைந்து விடாது. ஆனால், கார்த்திக்கு அமைந்தது. அது தான் ‘பருத்திவீரன்’ படம். இந்த படத்தை இயக்குநர் அமீர் இயக்கியிருந்தார்.

‘பருத்திவீரன்’ ஹிட்டிற்கு பிறகு கார்த்திக்கு அடித்தது ஜாக்பாட். அடுத்தடுத்து அவரின் கால்ஷீட் டைரியில் ‘ஆயிரத்தில் ஒருவன், பையா, நான் மகான் அல்ல, சிறுத்தை, மெட்ராஸ், கொம்பன், தீரன் அதிகாரம் ஒன்று, கைதி’ என படங்கள் குவிந்தது. ஒவ்வொரு படத்திலும் வித்தியாசமான கேரக்டரில் நடித்து ரசிகர்களிடம் அப்ளாஸ் வாங்கினார் கார்த்தி.

இப்போது, கார்த்தி நடிப்பில் ‘பொன்னியின் செல்வன்’ மற்றும் ‘சுல்தான்’ என இரண்டு படங்கள் லைன் அப்பில் இருக்கிறது. தற்போது, நடிகர் கார்த்தி தனது கால்ஷீட் டைரியில் இணைய ஒரு புதிய படத்துக்கு ஓகே சொல்லியிருப்பதாக தகவல் கிடைத்துள்ளது. இந்த படத்தை பிரபல இயக்குநர் முத்தையா இயக்க உள்ளாராம். இவர் ஏற்கனவே கார்த்தியை வைத்து ‘கொம்பன்’ என்ற படத்தை இயக்கியிருந்தது குறிப்பிடத்தக்கது. இன்னும் பெயரிடப்படாத புதிய படத்தை கார்த்தியின் அண்ணன் சூர்யா தனது ‘2D எண்டர்டெயின்மெண்ட்’ சார்பில் தயாரிக்க உள்ளார்.