அர்ஜுன் தாஸை காதலிக்கிறேனா?… அவருடன் எடுத்த புகைப்படம் குறித்து பேசிய ஐஸ்வர்யா லக்ஷ்மி!

மலையாள சினிமாவில் பாப்புலர் ஹீரோயின்களில் ஒருவராக வலம் வருபவர் ஐஸ்வர்யா லக்ஷ்மி. இவருக்கு தமிழில் அமைந்த முதல் படமே விஷாலுடன் தான். அது தான் ‘ஆக்ஷன்’. இந்த படத்துக்கு பிறகு நடிகை ஐஸ்வர்யா லக்ஷ்மிக்கு அடித்தது ஜாக்பாட்.

அடுத்தடுத்து இவரின் கால்ஷீட் டைரியில் ‘ஜகமே தந்திரம், புத்தம் புது காலை விடியாதா, கார்கி, கேப்டன், பொன்னியின் செல்வன் முதல் பாகம், அம்மு’ என தமிழ் படங்கள் இணைந்தது.

சமீபத்தில் இவர் நடித்திருக்கும் புதிய படமான ‘கட்டா குஸ்தி’ திரையரங்குகளில் ரிலீஸாகி சூப்பர் ஹிட்டானது. இந்த படத்தில் ஹீரோவாக விஷ்ணு விஷால் நடிக்க, இதனை இயக்குநர் செல்லா அய்யாவு இயக்கியிருந்தார். நேற்று ஐஸ்வர்யா லக்ஷ்மி தனது இன்ஸ்டாகிராம் பக்கத்தில் ‘கைதி, மாஸ்டர்’ புகழ் நடிகர் அர்ஜுன் தாஸுடன் எடுத்துக் கொண்ட புகைப்படத்தை ஷேர் செய்திருந்தார்.

இதனைத் தொடர்ந்து இவர்கள் இருவரும் காதலித்து வருவதாக கோலிவுட்டில் தண்டோரா போடப்பட்டது. தற்போது, ஐஸ்வர்யா லக்ஷ்மி இன்ஸ்டாகிராமில் “நானும் அர்ஜுன் தாஸும் நேரில் சந்தித்து பேசியபோது எடுத்த ஸ்டில்லை ஷேர் செய்திருந்தேன். இதனால் பரவி வரும் வதந்திகளை நம்ப வேண்டாம். நாங்கள் இருவரும் நல்ல நண்பர்கள் மட்டுமே” என்று கூறியுள்ளார்.