தென்னிந்திய சினிமாவின் முன்னணி இயக்குனர்களில் ஒருவரான எஸ் எஸ் ராஜமௌலி பிரம்மாண்ட காட்சிகளுடன் கூடிய திரைப்படத்தை உருவாக்குவதற்கு பெயர் போனவர்.
தொடர்ந்து பல வெற்றி தெலுங்கு திரைப்படங்களை எழுதி இயக்கி வந்த இவர் 2012ஆம் ஆண்டு நானி மற்றும் சமந்தா இணைந்து நடித்து வெளியான “நான் ஈ” திரைப்படத்தை இயக்கியதன் மூலம் தமிழ் திரையுலகிற்கு அறிமுகமானார்.
இதை தொடர்ந்து இவர் இயக்கத்தில் பிரம்மாண்டமான முறையில் இரண்டு பாகங்களாக வெளி வந்து தமிழ் ரசிகர்களிடையே மிகவும் ரசிக்கப்பட்ட திரைப்படம் “பாகுபலி”.
இந்த திரைப்படம் வெளியானதன் மூலம் பிரம்மாண்ட இயக்குனர் என்ற பெயரை எடுத்தார். இதைத்தொடர்ந்து தற்போது ஐந்து மொழிகளில் வெளியாவதற்காக உருவாகி வரும் RRR என்ற படத்தை இயக்கி வருகிறார்.
இந்த படத்தின் 50 நாள் கொண்ட முதல் கட்ட படப்பிடிப்பு முடிவடைந்ததாகவும் பெரும்பாலும் இரவு நேரங்களிலேயே இந்த படப்பிடிப்பு நடந்ததாகவும் இனி அடுத்த கட்ட படப்பிடிப்பு புதிய லொகேஷனில் நடைபெறும் என்றும் திரைப்படக் குழு தெரிவித்திருந்தது.
தற்போது ஹைதராபாத்தில் நடந்து வரும் சூட்டிங்கில் சீதை கதாபாத்திரத்தில் நடிக்க உள்ள ஆலியா பட் இருக்கும் பகுதிகள் படம் பிடிக்கப்பட்டு வருவதாகவும், இந்தப் பகுதியின் படப்பிடிப்பு ஒரு வாரத்தில் நிறைவு பெறும் என்றும் மீதமுள்ள படப்பிடிப்பில் ஆலியா பட் ஜனவரி, பிப்ரவரி மாதத்தில் கலந்துகொள்வார் என்றும் திரைப்பட குழு தகவல் வெளியிட்டுள்ளது.
மேலும் இந்த படத்தில் ராம் சரண் ஜோடியாக ஆலியா பட் நடிப்பதாகவும், இந்த காட்சிக்கான படப்பிடிப்புகள் தான் ஜனவரி மாதத்தில் நடக்கும் என்றும் எதிர்பார்க்கப்படுகிறது. இந்த படத்தை 2022ஆம் ஆண்டு வெளியிடுவதற்கான திட்டங்கள் நடைபெற்று வருவதாகவும் ஒரு தகவல் வெளிவந்துள்ளது.
Home