ரஜினிகாந்தின் பாபா படத்தில் நடித்துள்ள அனிருத் ரவிச்சந்தர்!

2011 ஆம் ஆண்டு தனுஷ் நடிப்பில் வெளியான ‘3’ திரைப்படத்தின் மூலம் இசையமைப்பாளராக திரையுலகிற்கு அறிமுகமானவர் அனிருத் ரவிச்சந்தர்.

இதைத் தொடர்ந்து எதிர்நீச்சல், வணக்கம் சென்னை, இரண்டாம் உலகம், வேலையில்லா பட்டதாரி, கத்தி, காக்கிச்சட்டை, நானும் ரவுடிதான், வேதாளம், மாரி, தங்கமகன், விவேகம், வேலைக்காரன், தானாசேர்ந்தகூட்டம், கோலமாவு கோகிலா, பேட்ட, தர்பார், தாராள பிரபு போன்ற வெற்றிப் படங்களுக்கு இசையமைத்து தனக்கென தனி ரசிகர் பட்டாளத்தை கொண்டுள்ளார்.

தற்போது லோகேஷ் கனகராஜ் இயக்கத்தில் விஜய் நடிப்பில் அடுத்து வெளிவரவிருக்கும் “மாஸ்டர்” திரைப்படத்தில் இசையமைத்துள்ளார் அனிருத் ரவிச்சந்தர்.

இதுமட்டுமின்றி டாக்டர், இந்தியன் 2, காத்துவாக்குல ரெண்டு காதல், எஸ்கே17, சியான்60 போன்ற படங்களுக்கு இசையமைக்கவும் ஒப்பந்தமாகியுள்ளார்.

இவர் இசையமைப்பாளர் மட்டுமல்லாது சிறந்த பாடகரும் கூட. பிரபல நடிகர் ரவி ராகவேந்திராவின் மகனான இவர் தற்போது நடிகராகவும் முயற்சி செய்து வருவதாக சமீபத்தில் செய்தி வெளியானது.

இவர் நடிகர் ரஜினிகாந்துடன் பாபா படத்தில் ஒரு பாடலில் இவர் இருக்கும் காட்சி தற்போது இணையதளத்தில் வைரலாகி வருகிறது. இந்த புகைப்படத்தில் ரஜினி அருகில் இவர் இருப்பார். அனிருத் ரவிச்சந்தர் ரஜினியின் நெருங்கிய உறவினர் என்பது குறிப்பிடத்தக்கது.