இன்று பிறந்தநாளை கொண்டாடும் எஸ்.ஜே.சூர்யா!

இயக்குனர் கே பாக்யராஜிடம் துணை இயக்குனராக தன்திரைத்துறை பயணத்தை தொடங்கி, பின்பு 1999ஆம் வருடம் அஜித் நடிப்பில் வெளியான “வாலி” படத்தின் மூலம் இயக்குனராக வலம்வரத் தொடங்கியவர் எஸ்.ஜே.சூர்யா.

இயக்குனராக திரையுலகிற்கு அறிமுகமான எஸ்ஜே சூர்யா திரைக்கதை எழுத்தாளர், நடிகர், இசையமைப்பாளர், தயாரிப்பாளர் என்று அனைத்து அவதாரங்களையும் எடுத்தார். இவர் தமிழ், தெலுங்கு, இந்தி ஆகிய மொழிப்படங்களில் பணிபுரிந்துள்ளார்.

இவர் 2004 ஆம் ஆண்டு தனது இயக்கத்தில் வெளியான “நியூ” திரைப்படத்தில் நடிகராக உருவெடுத்தார். பின்பு “கள்வனின் காதலி”, “திருமகன்”, “வியாபாரி” போன்ற படங்களில் ஹீரோவாக நடித்த எஸ்ஜே சூர்யா சமீபத்தில் வெளியான “ஸ்பைடர்” மற்றும் தளபதி விஜய் நடிப்பில் வெளியான “மெர்சல்” ஆகிய படங்களில் வில்லனாகவும் நடித்திருந்தார்.

2015 ஆம் ஆண்டு இவரது இயக்கத்தில் வெளியான “இசை” படத்தில் நடித்தது மட்டுமல்லாமல் இவர் இசையமைப்பாளராகவும் உருவெடுத்தார். இதற்குமுன் மராத்தி மொழியில் வெளியான “இஷ்க் வாலா லவ்” படத்தில் இசையமைத்திருந்தார் என்பது குறிப்பிடத்தக்கது.

இவர் இசையமைத்தது மட்டுமில்லாமல் பின்னணி பாடகராகவும் சில பாடல்களை பாடி ஒரு சில பாடல்களுக்கு வரிகளும் எழுதியுள்ளார்.

இப்படி பன்முகத் திறமைகளைக் கொண்ட எஸ்ஜே சூர்யா இன்று தனது 52 ஆவது பிறந்தநாளைக் கொண்டாடுகிறார்.

செல்வராகவன் இயக்கத்தில் எஸ் ஜே சூர்யா “நெஞ்சம் மறப்பதில்லை” என்ற படத்தில் 2017 ஆம் ஆண்டு நடிக்கத் தொடங்கினார். இந்த படத்தை பற்றிய அப்டேட் ஒவ்வொன்றாக வெளிவரும் நிலையில் இன்னும் அந்த படம் வெளிவருவதற்கான அதிகாரபூர்வமான தகவல் வெளிவரவில்லை. இந்தப்படத்தில் ப்ரோமோ வீடியோக்கள் வெளிவந்த நிலையில் ரசிகர்கள் இந்த படம் எப்போது வெளிவரும் என்று ஆவலாக காத்திருக்கிறார்கள்.