சிகிச்சைக்கு பணமின்றி தவித்த ‘பிதாமகன்’ பட தயாரிப்பாளர்… உதவ முன்வந்த ‘சூப்பர் ஸ்டார்’ ரஜினி!

2003-ஆம் ஆண்டு சூர்யா – விக்ரம் இணைந்து நடித்து வெளியான படம் ‘பிதாமகன்’. இந்த படத்தை பாப்புலர் இயக்குநர்களில் ஒருவரான பாலா இயக்கியிருந்தார். சூப்பர் ஹிட்டான இப்படத்தை ‘எவர்கிரீன் மூவி இண்டர்நேஷனல்’ நிறுவனம் சார்பில் வி.ஏ.துரை தயாரித்திருந்தார்.

தயாரிப்பாளர் வி.ஏ.துரை ‘பிதாமகன்’ மட்டுமில்லாமல் ‘என்னம்மா கண்ணு, லூட்டி, லவ்லி, விவரமான ஆளு, கஜேந்திரா’ ஆகிய படங்களையும் தயாரித்திருக்கிறார். சமீபத்தில், தயாரிப்பாளர் வி.ஏ.துரை வெளியிட்டிருந்த ஒரு வீடியோ பதிவில் தான் நீரிழிவு நோயால் பாதிக்கப்பட்டிருப்பதாக குறிப்பிட்டதுடன், சிகிச்சைக்கு பணமின்றி தவிப்பதாகவும் கூறியிருந்தார்.

இதனைத் தொடர்ந்து இவரின் சிகிச்சைக்காக நடிகர் சூர்யா ரூ.2 லட்சம் வழங்கினார். தற்போது, டாப் ஹீரோக்களில் ஒருவரான ‘சூப்பர் ஸ்டார்’ ரஜினிகாந்த் தயாரிப்பாளர் வி.ஏ.துரைக்கு போன் செய்து “எதற்கும் கவலைப்பட வேண்டாம்.

நான் பார்த்துக் கொள்கிறேன். ‘ஜெயிலர்’ ஷூட்டிங் முடிந்ததும் உங்களை நேரில் வந்து சந்திக்கிறேன்” என்று பேசியதாக தகவல் கிடைத்துள்ளது. ரஜினி தயாரித்து, நடித்த ‘பாபா’ படத்தில் வி.ஏ.துரை நிர்வாக தயாரிப்பாளராக பணியாற்றியிருந்தது குறிப்பிடத்தக்கது.